لا جــــــديـــد

لا جديد
قلب تشتت من جديد
واعصاب كانت من حديد
خارت
وذبلت هي قواي
والقمره ضاعت من سماي
كيف لا
وخل(ن) هجر
ما يقصد بهجره سواي
حزني شديد
والالم ماهو جديد
ودرب الفرح اصبح بعيد
اصبح سراب
وجه السعد قفل الباب
ماني سعيد
يا صاحب الراي السديد
دلني
لملم حطامي شلني
خل(ن) قصد بي بهجره انه يذلني
ماني ذليل
شخصي عزيز
ورافع هامتي فوق
ودمي من كثر همي
كنه من اللهب محروق
بس عيبي
اني احب
والله احب
غصب عني وعن عيني
وعن قلبي وعن فكري
سريت لصاحبي بحري
ابي اشكي حبيب(ن) لي
قصد هجري
ثلاث سنين
وجرحه داخلي يجري
وانا المظلوم
ومن يدري
اني بالسهر ملزوم
تعب كفي شديد العوم
في بحر الهجر وحدي
اكافح قد ما اقدر
وما اقدر
لاني بالسهر ملزوم
غصب عني هجر عيني
لذيذ النوم
وبعد اليوم
لو تسأل
عن احوالي
وكيف صارت
بعد هجر الحبيب اليوم
اقول لك بالجفا دارت
علي ايام مو بس يوم
اقول لك لا جديد
احلام طارت
واعصاب كانت من حديد
خارت
وقلب تشتت من جديد